Mongolia Expeditions - Mongolian National Geographic

MONGOLIA BIKE CHALLENGE 2010 Олон улсын уулын дугуйн уралдааны тамирчид 2010 оны 8-р сарын 7-нд Монгол улсад ирлээ. Эл олон улсын уралдаанд нийт 11 орны нийт 94 тамирчин дагалдан яваа хөгжөөн дэмчигч, гадаадын хэвлэл мэдээллийнхэнтэй нийлээд 108 гадаад иргэд хамрагдлаа. Тамирчид Улаанбаатарт Баянгол зочид буудалд байрласан бөгөөд MONGOLIA BIKE CHALLENGE уралдааны мэдээлийн төв Баянгол зочид буудалд ажиллаж, олон нийтэд тамирчдын талаар мэдээллүүдийг өгч байлаа. 8-р сарын 7-ны өдөр тамирчид БАЯНГОЛ зочид буудалд дугуйгаа угсарч уралдаанд бэлтгэн уралдаанд оролцох хувийн дугааруудаа хүлээж авлаа. . 8-р сарын 8-ны өглөөны 10 цагт дугуйчид Сүхбаатарын талбайд болсон нээлтийн ажиллагаанд оролцов. Нээлтийн ажиллагаанд БОАЖЯ-ны сайд Л.Гансүх, Биеийн тамир спортын газрын дарга Ч.Наранбаатар тэргүүтэй албаны хүмүүс оролцож тамирчидад уралдаандаа амжилт гаргахыг хүсэн ерөөлөө. 8-р сарын 9-ний өглөө тамирчид Дундговь аймгийн Бага Газарын Чулуу руу хөдлөв.
"MONGOLIA BIKE CHALLENGE 2010. 1-р гараа. Бага Газарын Чулуу - Хулд." цааш унших »

Цагаан суварга:  Дундговь аймгийн Өлзийт сумын нутагт эрт цагийн далайн ёроолын тунамал шаварлаг хурдасны давхаргаас он цагийн явцад салхи, усны үйл ажиллагаагаар эвдэрч ганга мөргөцөг үүсгэсэн нь алсаас харахад суварга мэт харагддаг. Үүнийг Цагаан Суварга хэмээн Монголчууд эртнээс хүндэтгэн нэрлэж ирсэн. Цагаан Суваргын эгц цавчим мөргөцөгийн өндөр нь 30-д м бөгөөд мөргөцөг нь нийтдээ 400-д м үргэлжилнэ. Баруун талаасаа цагаан тал учраас мөргөцөг нь мэдэгдэлгүй явсаар Цагаан Суваргын орой дээр гарч ирнэ. Орой дээр нь овоо босгосон байдаг. Эрэг мөргөцөг сул шороотой  тул унах аюултай. Тийм учир эрэг мөрөгцөгийн зах ирмэгээр явахдаа болгоомжтой байх хэрэгтэй. Эрт цагт хүмүүс зээр гөрөөс гэх мэт амьтдыг мөрөгцөг рүү шахаж агнах явдал нилээд байдаг байжээ. Өлзийт сум талаас буюу гурван төгрөгийн худаг талаас орж ирвэл Цагаан Суваргын байгалийн үзэсгэлэнг холоос тодорхой харах боломжтой. Сүүлийн жилүүдэд Цагаан Суваргыг үзэхээр зорин очих жуулчдын тоо нилээд нэмэгдэж байгаа бөгөөд ойр орчимд нь жуулчны хоёр ч бааз ажиллах болсон. Ерөнхийдөө гайгүй үйлчилгээ сайтай бааз нь Цагаан Суварга жуулчны бааз, Цагаан Суваргаас зүүн тийш 8 км-т байрлана. Утас нь: 99298155. Цагаан Суваргын ойролцоо, зүүн тийш Хэвтээ Босоогийн гэж нэрлэгдэх нэгэн агуй бий. Уг агуй Цагаан Суварга гэр бааз хойхно холгүй оршино. Цагаан Суварга GPS: N 44° 34' 16.2", E 105° 42' 42.8"
"Цагаан Суварга" цааш унших »

Ази тивд, тэр тусмаа онгон зэрлэг байгалийн гоо үзэсгэлэн, өнгө төрхөөрөө дэлхийд гайхагддаг манай улсад анх удаа "Mongolia Bike Challenge" уулын бартаат замын олон улсын уралдаан амжилттай болж өнгөрлөө. Монголын аялал жуулчлалын тур оператор "Монголиа Экспедишнс" компани, Италийн "Прогетто Авентура" компани хамтран зохион байгуулсан тус уралдаанд Монголоос гадна дэлхийн 10 орны 94 тамирчин оролцож, хоёр долоо хоногийн турш Монголын говь, хангай нутгаар уралдсан юм. Тэмцээний нээлтийн ажиллагаа энэ сарын 8-нд Сүхбаатарын талбайд болж, тамирчид 9-нд Дундговь аймгийн Бага газрын чулууг зорьжээ.
"MONGOLIA BIKE CHALLENGE 2010 дугуйн уралдаан амжилттай болж өндөрлөлөө." цааш унших »

Монгол Улсад анх удаа зохион байгуулагдаж буй MONGOLIA BIKE CHALLENGE олон улсын уулын дугуйн уралдаанд Испанийн алдарт дугуйчин, Дэлхийн аварга, Испаний олон өдрийн Вуелта дугуйн уралдааны дөрвөн удаагийн аварга, Тур де Франс уралдааны шилдэгүүдийн нэг Роберто Эрас уралдана. Тэрээр MONGOLIA BIKE CHALLENGE олон улсын уулын дугуйн уралдааны МАСТЕР 1 ангилалд уралдахаар мэдүүлэгээ өгөөд байгаа юм байна. Тэрээр 1995 оноос мэргэжилийн дугуйн Келме багт уралдаж эхэлсэн бөгөөд анхныхаа түрүүг 1996 онд Subida al Narancо Испанийн дугуйн олон өдрийн уралдаанд түрүүлснээр амжилтын гараагаа эхлүүлжээ. Тэрээр 2001 оноос US Postal багт Lance Armstrong -ын хамтран зүтгэчээр уралдаж Тур де Франс уралдааны уулын хэсгүүдэд түүнд туслаж байсан бөгөөд 2002 онд Тур Де Франс-д нийлбэр дүнгээрээ 5-р байрт орж байжээ.
"Дэлхийн шилдэг дугуйчдын нэг Роберто Эрас Монголд уралдана." цааш унших »

Монголын уулчид Баян-Өлгий аймгийн Толбо сумын нутаг Сайрын ууланд авирахаар зорих гэж байна. Сайрын уул нь далайн түвшинээс дээш 3984 метр өргөгдсөн бөгөөд өмнө нь Монголын уулчид авирч байгаагүй юм. Нутгийнхан Сайрын уулыг Сухайт, Сайрын уул гэж нэрлэдэг. Сайр хайрханд авирах эл авиралтыг Ховд аймгийн Засаг даргын тамгын газар, Ховдын Биеийн тамир, спортын газраас хамтран зохион байгуулж байгаа бөгөөд энэхүү авиралтыг Монгол Улсын гавьяат тамирчин Г. Өсөхбаяр ахлаж байна. Сайрын уул  бол Монголын уулчдын авираагүй үлдсэн цөөхөн цаст оргилууд нэг бөгөөд ийнхүү эхний авиралтыг Монголын уулчид өргөн бүрэлдэхүүнтэйгээр хийх гэж буй нь уулын спортын түүхэнд тэмдэглэгдэн үлдэх үйл явдал юм.  Уулчдын баг зургадугаар сарын 2-нд Улаанбаатар хотоос хөдлөнө. Зургадугаар сарын 6-нд үндсэн авиралтаа эхлүүлэхээр төлөвлөж байна. Авиралтад Улаанбаатар, Орхон, Баян-Өлгий, Өмнөговь, Завхан, Багануурын 60 гаруй уулчид оролцож буй бөгөөд МУ-ын 3 дахь ерөнхийлөгч Н.Энхбаяр авиралтын багт багтаж авирна.
"Сайр Хайрхан - Сайрын ууланд Монголын уулчид авирна." цааш унших »

Түрэгийн хаант улсын гурван хааны зөвлөх байсан мэргэн сайд Тоньюкукт зориулан босгосон тахилын онгон бүхий дурсгал Төв аймгийн Эрдэнэ сумын нутаг Баянцогт уулын баруун хойно Налайх хотоос зүүн тийш 15 километр, Ар жанчивлангийн сувиллаас баруун тийш 4 километрт оршино. 1957 онд доктор Н.Сэр-Оджав Тоньюкукын бунхант булшийг өмнөх судалгаануудаас арай илүү өргөн хүрээтэй малтан шинжилжээ. Судалгааны үр дүнд нэг эгнээ өрсөн хөх тоосгон хана бүхий барилгын нуранги гарчээ. Мөн шал нь битүү тоосгоор өрөгдсөн, вааран дээвэртэй байсан нь тодорхой болсон. Ханыг хар улаан, цагаан шаргал гэх мэт хурц өнгөөр будсан байсан. Олон ваар сав олдсоны ихэнх нь дэрэвгэр амсартай, хавтгай ёроолтой цар маягтай байжээ. Барилгын баганан дээр өтгөн хөмсөгтэй, том алаг нүдтэй, хурц соёотой, сартгар хамартай хүний нүүрийг дүрсэлсэн байсан. Тоньюкукын гэрэлт хөшөөний орчимд дээл өмссөн, ур хийц нь харилцан адилгүй 9 ширхэг саарал боржин хүн чулуу байсан. Цогцолбор дурсгалын өмнөөс зүүн зүгт цувуулан 1300 метр зайд 400 орчим цагаан чулуу байрлуулсан байсан бөгөөд тэдгээрийн зарим нь газар дээр ил харагддаг.  Эртний Түрэгчүүд нас барагсдаа чандарлан оршуулахын зэрэгцээ тэдний сүнсийг амаржуулах зорилгоор тахилгын зан үйл зохион байгуулж, дараа нь эргэж байхаар тахилын онгоныг тусад нь байгуулдаг байжээ. Эдгээр онгон нь нас барсан хүний язгуур гарал, зэрэг дэвээс нь шалтгаалан их бага янз бүр байхаас гадна бүтэц, ур хийцийн хувьд өөр хоорондоо ялгаатай байдаг. Онгоны зохион байгуулалт нь дөрвөлжин хавтангаар хашлага босгоод өмнө нь хүн чулуу байрлуулж, хөшөөний өмнөөс уулын бэл хүртэл олон цагаан чулууг босгосон байдаг. Ингэж чулуу босгодог утга учрыг судлаачид хоёр янзаар тайлбарладаг. Эхнийх нь, онгоны эзэн эрийн дайн тулаанд алж устгасан дайсны тоогоор босгодог. Хоёр дахь таамаг нь, уг хүнийг оршуулах болон тахиж тайх ёслолд оролцсон хүмүүс өөрийгөө төлөөлүүлж босгосон билэг тэмдэг гэж үздэг.
"Мэргэн Тоньюкукын цогцолбор." цааш унших »

Дорноговь аймгийн Дэлгэрэх сумын нутагт Цонжийн чулуу хэмээх  хүрмэн чулуунаас тогтсон жижиг хадат толгой бий.  Энэ толгойн чулуу нь болор шиг зургаан талтай, талуудыг нийлүүлж өрсөн мэт сонин, босоо тогтоцтой, хар саарал өнгөтэй.  Энэ чулууг өнгөлбэл гялалзсан хар өнгөтэй болно. Энэ толгой дээр аянга их буудаг, аянга буух үед чулуу бутарч унадаг гэж нутгийнхан ярьдаг. Хүрмэн чулуу хайлмаг байх үедээ асар их даралтад орж, олон талт багана хэлбэртэй болдог гэж шинжлэх ухаан тайлбарладаг.  Цонжийн чулуу нь Монгол оронд буй байгалийн өвөрмөц сонин тогтоцтой газруудын нэг, байгалийн эхийн бүтээл юм. Монгол оронд ийм хэд хэдэн газар байдаг боловч Цонжийн чулуу шиг зөв зургаан талтай чулуу байхгүй юм. Ийм тогтоцтой чулуу дэлхийд ч элбэг биш. Гэхдээ байгалийн энэхүү өвөрмөц тогтоц цөөнгүй газарт бий, миний мэдэхээр Хойд Ирланд, Солонгосын Чежу аралд байдаг.  Олон улсад байгалийн энэхүү тогтоцыг hexagonal rock  буюу зургаан талт чулуу гэдэг.  Нутгийнханы аман яриагаар Цонжийн чулууны чулууг дээр үед хятадууд урагшаа зөөдөг байсан гэдэг. Цонжийн чулуунаас холгүй Хамбын ширээ гэж нэг жижиг толгой бий. Энэ толгойд үнэрт хамба шарилж ургана. Энэ шарилжийг Хамба Зундуй гэдэг хүн хятадаас захиж авчруулан тарьж ургуулсан гэдэг яриа бий. GPS: N 45° 58' 55.2", E 111°26' 10.6". Дэлгэрэх сумаас Түвшинширээ сум орох замын ойролцоо бий.  Дэлгэрэх сумаас 22 орчим километр бий.
"Цонжийн чулуу - hexagonal rock." цааш унших »

MONGOLIA BIKE CHALLENGE - уралдааны ерөнхий зохион байгуулагч WILLY MULONIA 5-р сарын 3-наас 10-ний хооронд Монгол улсад ирж уралдааныг зохион байгуулах Монголын талын албаны хүмүүстэй уулзаж ярилцлаа.  Тэрээр Монгол улсад байх хугацаандаа Байгаль орчин Аялал жуулчлалын сайд Л. Гансүх, Монголын Аялал Жуулчлалын Холбооны дэд ерөнхийлөгч Н.Эрдэнэбат, Биеийн Тамир Спортын Газрын дарга Ч.Наранбаатар зэрэг албаны хүмүүстэй уулзаж  MONGOLIA BIKE CHALLENGE уулын дугуйн олон улсын уралдааныг хэрхэн зохион байгуулах тухайгаа танилцуулж, зохих шатны байгуулгуудаас дэмжлэг хүслээ.
"Mongolia Bike Challenge. - Willy Mulonia Монголд." цааш унших »

Монгол улсад уулын дугуйн олон улсын уралдаан зохион байгуулах сэтгэл өвөрлөсөн  хэсэг залуучууд Монгол орноор дугуйгуйгаар аялж 8000 км  замыг туулан, дугуйн уралдааныхаа зам маршрутыг хийжээ. Сонгосон зам маршрутаараа гурвантаа аялал зохион байгуулж гадаад дотоодын дугуйчдын чансааг шалгаж, санал бодлоо хуваалцаж, алдаа оноогоо дүгнэсэн юм.  Энэ дугуйн уралдааны нэр MONGOLIA BIKE CHALLENGE.  Энэхүү уралдаан нь Ази тив тэр дундаа Монгол улсад анх удаа зохион байгуулагдаж буйгаараа онцлогтой.  Ер нь энэ төрлийн 18 уралдаан Австрали, Африк, Өмнөд Америкт явагддаг. MONGOLIA BIKE CHALLENGE уралдаан нь Монголын нэр хүндийг дэлхийн дугуйчдын дунд алдаршуулах, Tour De France шиг том уралдааныг Монголдоо бий болгох зорилготой.  MONGOLIA BIKE CHALLENGE нь жил болгон болох бөгөөд эхний жилд хувийн амжилтаар уралдах бөгөөд дараа дараагийн жилээс багийн уралдаан болгож өргөжүүлэх зорилготой.  Энэ жилийн хувьд Монголын дугуйчдын 10 хүний бүрэлдэхүүнтэй баг оролцож уралдана. Монголын багийн гаргах амжилтаас хамаарч дараагийн жилүүдэд дэлхийн бусад улс орны мэргэжилийн дугуйчдын баг энэхүү уралдааныг сонирхон оролцох болно гэж уралдаан зохион байгуулагчид үзэж байна. MONGOLIA BIKE CHALLENGE - Олон улсын уулын дугуйн уралдааны гол зорилго нь дэлхийн цаг уурын өөрчлөлт, дулаарлын эсрэг хүн төрөлхтөний нэгдэхийг уриалж буй юм.  Дэлхийн цаг уурын өөрчлөлтөд  Монгол улс ихээр нэрвэгдэж цөлжих явц эрчимтэй явагдаж байна.  Уралдааны зам маршрутыг хийж говийн нутгаар гурван жилийн өмнө явж байхад бид хатуу сайхан замаар явж байсан бол өнгөрсөн жил уг замаараа дугуйгаар аялахад, дугуй далд ором элстэй, уруу газар дугуй өнхөрдөг бол өнхөрөх ямар ч боломжгүй, маш хүч гарган жийж байсан. Энэ говийн эко систем алдагдаж, цөлжих явц хэрхэн хурдацтай явагдаж байгааг илтгэж буй хэрэг. MONGOLIA BIKE CHALLENGE - 2010 оны 8-р сарын 7-ноос 22-ны хооронд Монгол нутгаар говь хангай хосолсон 1400 км замыг Дундговь, Өмнөговь, Баянхонгор, Өвөрхангай, Архангай аймгийн нутгуудаар туулан өнгөрнө. Мөн Мандалговь, Даланзадгад, Цэцэрлэг, Хархорин зэрэг томоохон суурин газруудыг дайран өнгөрнө. Эдгээр газруудад Монголчууд бид дэлхийн чансаа өндөртэй дугуйчдын хэрхэн уралдахыг харах боломжтой. MONGOLIA BIKE CHALLENGE - 10 гараа, 10 бариатай. Уралдааны гараа Дундговь аймгийн нутаг Бага Газарын Чулууны уулаас эхэлж, Өвөрхангай аймгийн Хархорин сумын нутаг Эрдэнэзуугийн хийдийн өмнөх талбайд шийдвэрлэх бариаг хийж тэмцээний аваргууд тодорно.
"MONGOLIA BIKE CHALLENGE - Олон улсын уулын дугуйн уралдаан эхлэхэд 85 хоног үлдлээ." цааш унших »

Баянзүрхийн бугат хөшөө нь Монгол баруун хэсэгт буй хамгийн томд тооцогдох цогцолбор дурсгал юм. Энд 30 орчим том, жижиг бугат хөшөө, олон тооны булш хиргисүүр байдаг.  Баянзүрхийн буган чулуун хөшөөдийн ихэнхид нь бугыг гоёмсог байдлаар дүрсэлнээс гадна 5 өнцөгт дүрс, чичлүүр хутга болон бусад зэр зэвсгийн зүйлсийг дүрсэлсэн байдаг. Эдгээрийн дотроос хамгийн сонирхолтой дүрслэл нь 5 өнцөгтийн дүрс болно. Баянзүрхийн буган чулуун цогцолбор нь Ховд хотоос 185 км, Мөст сумаас 50 орчим км-т, Бага Улаан даваагаар давж Бодончийн хавцал руу уруудах зам дээр байна.  Үенч, Бодончийн хавцлаар явж буй зорчин явагсад буугаад үдлэхэд тохиромжтой газар. GPS: N 46° 35' 24.3", E 92 ° 17' 24.1"
"Баянзүрхийн буган хөшөө цогцолбор." цааш унших »